December 11, 2017

The Day of the Jackal (වෘකයාගේ දවස)

The Day of the Jackal (වෘකයාගේ දවස)

ද ඩේ ඔෆ් ද ජැකල් (වෘකයාගේ දවස) යනු බ්‍රිතාන්‍ය ජාතික ෆෙඩ්‍රික් ෆෝර්සයිත් විසින් ලියන ලද, 1971 දී පළ වූ, ත්‍රාසජනක නවකතාවකි. ඓතිහාසික කරුණු මත පදනම් ව ලියන ලද ප්‍රබන්ධ කතාවක් වන මෙහි සඳහන් වන්නේ හිටපු ප්‍රංශ ජනාධිපති චාර්ල්ස් ඩි ගෝල් මරා දැමීමට කරන ලද කුමන්ත්‍රණයක් සහ එය වැළැක්වීම පිණිස ගෙන යන පොලිස් මෙහෙයුමකි.

මෙම නවකතාව අතිශයින් ජනප්‍රිය වූ අතර 1972 දී ඇමරිකාවේ අභිරහස් ලේඛක සංගමය (Mystery Writers of America) විසින් පිදෙන “එඩ්ගාර් සම්මානය” ද ඊට ලැබුණි.

නවකතාව ඇරඹෙන්නේ ශෝන් – මාරි බැස්ටියන් – තියරි (Jean-Marie Bastien-Thiry) විසින් කරන ලද ඝාතන ප්‍රයත්නයක් පිළිබඳ සැබෑ විස්තරයකිනි. එහෙත් ඉන් පසු එන කතාව ප්‍රබන්ධයක් වේ.

පසුබිම

ජෙනරාල් චාර්ල්ස් ඩි ගෝල් 1958 දී බලයට පැමිණෙද්දී ඇල්ජීරියාවේ නිදහස් අරගලය ක්‍රියාත්මක වෙමින් පැවතුණි. එහි වූ යුරෝපීයයන් මෙන්ම ප්‍රංශ ජාතිකවාදීන් ඇල්ජීරියාවට නිදහස දීමට කිසි සේත් එකඟ නොවූහ. ඩි ගෝල් 1962 දී ඇල්ජීරියාවට නිදහස ප්‍රදානය කිරීමට කැමැත්ත පළ කිරීම ජාතිකවාදීන් අතර ඔහු අප්‍රසාදයට පත් වීමට හේතු විය. මේ අතර “රහසිගත හමුදා සංවිධානය” නම් අන්ත ජාතිකවාදී සංවිධානය ද විය.

1962 දී බැස්ටියන් තියරි විසින් කරන ලද ඝාතන ප්‍රයත්නයක් (සැබෑ සිදුවීමක්) අසාර්ථක විය. මේ අතර රහසිගත හමුදා සංවිධානයේ ප්‍රධානී ඇන්ටොයින් ආර්ගූ ජර්මනියේදී පැහැරගෙන ප්‍රංශයට ගෙන ඒමට ප්‍රංශ විශේෂ බලකා සමත් වූහ.

නවකතාව

ප්‍රබන්ධ කතාවේ ආකාරයට, එම අසාර්ථක ප්‍රයත්නයෙන් සහ පැහැරගැනීමෙන් පසුව, ආර්ගූගේ දෙවැනියා වූ ලුතිනන් කර්නල් මාර්ක් රොඩින්, ඩි ගෝල් ඝාතනය සඳහා නව මෙහෙයුමක් දියත් කිරීමට තීරණය කරයි. නමුත් ගැටලුව වන්නේ ඔහුගේ සංවිධානය පිළිබඳ ප්‍රංශ ආරක්ෂක අංශ මනාව විස්තර දැන සිටීම ය. එහෙයින් සංවිධානයට පිටින්, ආරක් ෂක අංශ නොදත් ඝාතකයකු එම මෙහෙයුම සඳහා යොදවා ගන්නට ඔහු තීරණය කරයි.

එම ඝාතකයාගේ ආරූඪ නාමය “වෘකයා” වේ.

ඝාතකයා බඳවා ගැනීමෙන් පසු ඔහු විසින් කෙරෙන මූලික සූදානම් වීම පිළිබඳ ඉතා පුලුල් විස්තරයක් පොතෙහි ලබා දෙන්නේ එම සිද්ධිය සත්‍ය වශයෙන් ම වූ තරමට හැඟීමක් ජනිත කරමිනි. එමෙන්ම ඝාතකයා පසුපස හඹා යන ක්ලෝඩ් ලෙබෙල් ප්‍රමුඛ ප්‍රංශ පොලිස් මෙහෙයුම ද ඉතා හොඳින් විස්තර කර ඇත.

පොත අවසන දී ඉතා වේගයෙන් සිදු වන සිද්ධි කිහිපයකින් කතාව අවසන් වේ.

මෙම කෘතිය මූලාශ්‍ර කරගෙන 1973 දී චිත්‍රපටයක් නිර්මාණය වූ අතර සිංහල භාෂාව ඇතුලු භාෂා ගණනකට එය පරිවර්තනය වී ඇත. සිංහල පරිවර්තනය අභය හේවාවසම්ගේ ය.

About The Author

Related posts

Leave a Reply